rki.news
اسٹاف رپورٹر، رہبر کسان انٹرنیشنل
دوحہ، قطر — 5 ستمبر 2025
پختون ویلفیئر سوسائٹی قطر کا مرکزی اجلاس آج دوحہ میں منعقد ہوا جس میں تنظیمی معاملات مکمل کر لیے گئے۔ اس خصوصی اجلاس میں اراکین نے بھاری اکثریت سے جناب جانان بنگش کو دوبارہ مرکزی چیئرمین منتخب کر لیا۔
اجلاس میں انجینئر راشد خان اورکزئی کو جنرل سیکرٹری اور روحان خان بنگش کو صدر منتخب کیا گیا۔ یہ دونوں اراکین قطر کی کمیونٹی میں جانا پہچانا نام رکھتے ہیں اور چیئرمین جانان بنگش کے ساتھ شامل ہونے سے پختون ویلفیئر سوسائٹی کی سرگرمیوں کو مزید تقویت ملے گی۔
منتخب عہدیداران نے اس عزم کا اظہار کیا کہ وہ کمیونٹی کی خدمت، نوجوانوں کی فلاح و بہبود، اور تعلیمی و سماجی سرگرمیوں کے فروغ کے لیے اپنی بھرپور صلاحیتیں بروئے کار لائیں گے۔ تنظیم کے اراکین نے نومنتخب قیادت کو مبارکباد دی اور مکمل تعاون کی یقین دہانی کرائی۔
مقررین نے کہا کہ پختون ویلفیئر سوسائٹی قطر ہمیشہ سے محنت کشوں، طلبا اور کمیونٹی کے مسائل کے حل کے لیے سرگرم رہی ہے اور یہ سلسلہ نئے جوش و جذبے کے ساتھ جاری رہے گا۔ اجلاس میں مستقبل کے لائحہ عمل پر بھی گفتگو کی گئی اور فیصلہ کیا گیا کہ تعلیمی پروگرامز، ثقافتی تقریبات اور فلاحی سرگرمیوں کو مزید وسعت دی جائے گی تاکہ زیادہ سے زیادہ کمیونٹی ممبران اس سے مستفید ہو سکیں۔
آخر میں دوبارہ منتخب چیئرمین جناب جانان بنگش نے پختون کمیونٹی کا ان پر اعتماد کرنے پر شکریہ ادا کیا اور وعدہ کیا کہ وہ قطر میں پختون کمیونٹی کی بہتری اور ترقی کے لیے اپنی بھرپور صلاحیتیں وقف کریں گے۔ پروگرام ہلکے ریفریشمنٹ کے ساتھ اختتام پذیر ہوا۔
