—— غزل ——

Poetry - سُخن ریزے , Print Paper , / Wednesday, November 20th, 2024

مجھے خلوت سے اُلفت ہے مجھے تنہا ہی رہنے دو
سہارا دو نہ چھاؤں کا غموں کی دھوپ سہنے دو

دیا ایسا جلاؤں کیوں جو میرا گھر جلا ڈالے
مبارک روشنی تم کو مجھے ظلمت میں رہنے دو

شکایت کچھ نہیں تم سے مقدر تھا یہی میرا
مرے اشکوں پہ مت جاؤ یہ بہتے ہیں تو بہنے دو

زمانے کی روش ہے یہ کہ اچھوں کو برا کہنا
مری اچھائیوں کو جو بُرا کہتے ہیں کہنے دو

مجھے بس چاہیے ہم دم تمھارے پیار کا زیور
میں یہ کہتی نہیں تم سے مجھے سونے کے گہنے دو

مناؤ ں سوگ کیا اُسکا فقط دل ہی تو ٹوٹا ہے
محض دنیا ہی اُجڑی ہے ارے چھوڑو بھی رہنے دو

از قلم۔۔
ڈاکڑ شمائلہ آفریں نظر