غزل

Poetry - سُخن ریزے , / Thursday, December 5th, 2024

کیا آگ ہے یہ عشق بیاں ہو نہیں سکتا
ہم راکھ بھی ہو جائیں دھواں ہو نہیں سکتا

مٹھّی میں بھلا قید ہوئی ہے کبھی خوش بو
یہ رنگِ محبّت ہے نہاں ہو نہیں سکتا

ٹوٹا ہے فلک یا کہیں ٹوٹا ہے کوئی دل
یوں ہی تو کہیں شورِ فغاں ہو نہیں سکتا

ملتے نہیں خوشبو بھرے خوش رنگ سے الفاظ
لفظوں میں تِرا حسن بیاں ہو نہیں سکتا

دھڑکا بھی اُسی کو ہے جو سرسبز ہے راغبؔ
جو خشک ہے مائل بہ خزاں ہو نہیں سکتا

افتخار راغبؔ
ریاض، سعودی عرب
کتاب: خیال چہرہ