غزل

Poetry - سُخن ریزے , / Monday, December 30th, 2024

فہم درکار ہے شیخ جی کو بہت
جانتے ہیں برا شاعری کو بہت

جانور سے پریشاں نہیں جانور
آدمی سے ہے دکھ آدمی کو بہت

میرے دشمن بھی روئیں گے کھو کر مجھے
میں نے دی ہیں دعائیں سبھی کو بہت

میں دسمبر ہوں آتا ہوں پہلے مگر
یاد کرتے ہیں سب جنوری کو بہت

سیلفی میں بہت مسکراتے ہو تم
کیا ترستے ہو آسودگی کو بہت

بھول جاتی ہے احسان برسات کا
جوش آتا ہے چھوٹی ندی کو بہت

جب اُتارو، عداوت پہ آئے اُتر
یوں نہ سر پر چڑھاؤ کسی کو بہت

خوبیوں پر رہیں گے وہ راغبؔ خموش
اور اچھالیں گے اک اک کمی کو بہت

افتخار راغبؔ
ریاض، سعودی عرب