غزل

Poetry - سُخن ریزے , Snippets , / Monday, December 30th, 2024

مت سمجھو یہ غرض نہیں گر مانگتے نہیں
مر جاتے ہیں انا پہ مگر مانگتے نہیں
باطل کے سامنے جو جھکیں خوف سے کبھی
اللہ سے وہ گردن و سر مانگتے نہیں
مانگے کا یہ اجالا مبارک ہو دوستو !
ہم زندگی سے رنگ و سحر مانگتے نہیں
اے رب ! تو غرق کر کہ لگا پار ناؤ کو
ہم زندگی کا “اندھا سفر” مانگتے نہیں
ان کے بھی دل میں خواب مچلتے ہیں حیف جو
فٹ پاتھ ہی پہ مرتے ہیں گھر مانگتے نہیں

نور اقبال
جگتدل (مغربی بنگال)