غزل

Poetry - سُخن ریزے , / Monday, January 13th, 2025

رغبت مری، رقیب سے فرصت ملے تو دیکھنا
دل کو مرے قریب سے، فرصت ملے تو دیکھنا

ظالم ہی کے قریب ہیں، مانا کہ ہم عجیب ہیں
رہتے ہیں کیوں عجیب سے، فرصت ملے تو دیکھنا

کیسی خلش، کسک ہے کیوں، معدوم وہ چمک ہے کیوں
کیا ہے گلہ نصیب سے، فرصت ملے تو دیکھنا

یہ جو ترے قریب ہیں، کیا واقعی حبیب ہیں
یا ہیں فقط حبیب سے، فرصت ملے تو دیکھنا

راغبؔ کی کیا ہے شاعری، سورج کی نرم روشنی
مہتاب سا ادیب سے، فرصت ملے تو دیکھنا

افتخار راغبؔ
ریاض، سعودی عرب