غزل

Poetry - سُخن ریزے , / Monday, April 7th, 2025

rki.news

اِک طرف باطل کا لشکر میں اکیلا اِک طرف
اور تماشائی بنی ہے ساری دنیا اِک طرف

اِک طرف کبر و ریا، مکر و دغا کی بجلیاں
انکساری، دردمندی کا اجالا اِک طرف

اک طرف پُر جوش طوفاں کی طرح کذّابِ وقت
صورتِ کوہِ گراں اِک شخص سچّا اِک طرف

اِک طرف حد سے زیادہ اپنی طاقت پر غرور
مالکِ نصرت فقط تجھ پر بھروسا اِک طرف

اِک طرف جور و جفا، ظلم و ستم کی آندھیاں
جل رہا ہے اِک دیا صبر و رضا کا اِک طرف

اک طرف اہلِ ہوس کا اک انوکھا اتحاد
اپنی ہی دھُن میں مگن راغبؔ ہے تیرا اک طرف

افتخار راغبؔ
ریاض، سعودی عرب
کتاب: لفظوں میں احساس