نظم

Poetry - سُخن ریزے , Snippets , / Sunday, September 1st, 2024

“تُو جو یاد آئے تو پِھر وقت بھی لَوٹ آتا ہے”

کون کہتا ہے گیا وقت نہیں لَوٹ سکا
کون کہتا ہے کہ جب وقت گُذرتا ہے تو پِھر
دِل بدَل جاتے ہیں جذبات بدَل جاتے ہیں

کِس کو معلوم ہے آئینِ وفا میرے سِوا
تُو جو یاد آئے تو پِھر وقت بھی لَوٹ آتا ہے

میں نے کل بھی تِری زُلفوں کی مَہک پائی ہے
کل بھی مانُوس سی اِک شام کو ڈَھلتے دیکھا
کل بھی اِک شَب سے شناسائی سی محسُوس ہوئی
چَاند کَل بھی مِرے ہمراہ بہت دیر چلا
اور پھر صُبح کی اُمید بھی مانُوس لگی
تُجھ کو سوچا تو تُجھے سامنے پایا میں نے
میرے اِحساس کی آغوش میں بِیتے لمحے
تیری یادوں کی کِسی لوری کے تَرسے لَمحے
اِک تِرے نام کی ہِچکی میں پروئے لَمحے
میرے ہاتھوں پہ تِرے نام کی بَیعَت کرکے
میرے پہلو میں مؤدَب سے بہت دیر رہے

دیر تک مُجھ کو تِرے قُرب کا اِعزاز رہا
مُجھ کو حاصِل جو تِرے وَصْل کا اعجاز رہا
اور میں محوِ مُناجات و مُناجات و مُناجات رہا
رِشتہِ رَوح و بَدَن محوِ مُنافات رہا
ذہن تھا طَوفِ سوالات و جوابات میں گُم
اور میں مُنتَظَرِ کَشْف و کَرامات رہا
حُسن تھا جَلوہ فِگَن زیرِ سماوات مگَر
عِشق رَقصِندہ و ملزُومِ حِجابات رہا

سب تو ویسا ہی تھا اے جانِ غزل میرے لیے
میری چاہت میرا انداز بدل پایا نہیں
وقت گذرا ہے مگر میں نے گُذارا ہی نہیں۔
تُو وُہی
میں بھی وُہی
اور تِرا پیار وُہی
تُو جو یاد آئے تو پِھر وقت بھی لَوٹ آتا ہے

سلیم کاوش