ذمےداری: زندگی کا اصل امتحان

Articles , Snippets , / Saturday, October 4th, 2025

rki.news

فیصلے خود کریں، نتائج قبول کریں، یہی جینے کا سلیقہ ہے

تحریر: طارق محمود
میرج کنسلٹنٹ
ایکسپرٹ میرج بیورو
03132009181

زندگی دراصل ذمےداری کا دوسرا نام ہے۔ یہ محض بوجھ ڈھونے جیسا عمل نہیں بلکہ عقل، شعور اور ارادے سے فیصلے کرنے کی صلاحیت ہے۔ بدقسمتی سے ہم میں سے زیادہ تر لوگ اپنی عقل کو قفل لگا کر دوسروں کے تجربات اور کہانیوں پر انحصار کرتے ہیں۔ ڈرامے، ناول، سماجی تاثر یا بزرگوں کی خواہشات — سب مل کر ہماری سوچ کو ایسا سانچہ دیتے ہیں کہ ہم اپنی زندگی کے سب سے اہم فیصلے بھی دوسروں کے ہاتھوں میں دے بیٹھتے ہیں۔ اور جب نتائج ہمارے مطابق نہیں نکلتے تو یہ کہہ کر خود کو تسلی دیتے ہیں کہ یہ فیصلہ تو ہمارا تھا ہی نہیں، والدین نے کیا یا حالات نے مجبور کیا۔

یہ رویہ ہمیں اندر سے کمزور کر دیتا ہے۔ ہم اس خوف کو پالنے لگتے ہیں کہ اگر کوئی قدم غلط پڑ گیا تو طعنے اور الزامات کا سامنا کرنا ہوگا۔ اس ڈر سے ہم ذمےداری سے ہی فرار اختیار کرتے ہیں۔ لیکن حقیقت یہ ہے کہ کوئی بھی فیصلہ کبھی بھی آسان یا مشکلات سے خالی نہیں ہوتا۔ ہر راستے میں مسائل آتے ہیں، اور اصل زندگی اس میں ہے کہ ہم اپنے فیصلے کے ساتھ ڈٹ کر کھڑے رہیں اور مشکلات کو حل کریں۔ یہی وہ رویہ ہے جو انسان کو اعتماد دیتا ہے۔

آج کی نوجوان نسل سرمایہ دارانہ نظام کے پیدا کردہ غیر یقینی ماحول میں الجھ کر اپنی قوتِ فیصلہ کھو بیٹھی ہے۔ وہ چاہتی ہے کہ سب کچھ تیار ملے، بنا کسی جدوجہد کے۔ لیکن یہ خواب وقتی آسائش تو دے سکتا ہے، اصل کامیابی کبھی نہیں۔ بےعملی دراصل موت ہے، اور دوسروں کے اشاروں پر چلنا اپنی عقل پر تالا لگانے کے مترادف ہے۔

اگر والدین اور معاشرہ اپنے دور کے فرسودہ تصورات کو آج کی نسل پر مسلط کریں، تو نتیجہ یہی نکلتا ہے کہ نوجوان اپنی زندگی کے فیصلے بھی آزادانہ نہیں کر پاتے۔ وہ اپنی خواہشات اور خوابوں کو قربان کر کے دوسروں کے فیصلوں پر چلتے ہیں اور پھر زندگی بھر اس احساس کے ساتھ جیتے ہیں کہ یہ میری غلطی نہیں تھی۔ مگر حقیقت یہ ہے کہ یہ خود ان کی کمزوری ہے کہ انہوں نے اپنے فیصلوں کی ذمےداری لینے کی ہمت نہ دکھائی۔

اصل امتحان یہی ہے کہ ہم چھوٹے سے چھوٹے فیصلے بھی خود کریں، ان کے نتائج کا سامنا کریں، اور سیکھ کر آگے بڑھیں۔ ذمےداری سے بھاگنے والے نہ اپنی زندگی کو سنوار سکتے ہیں اور نہ اپنی آنے والی نسل کو کچھ سکھا سکتے ہیں۔ انسان کی اصل عظمت اسی میں ہے کہ وہ مشکلات کو اپنی طاقت میں بدل کر اپنی راہ خود متعین کرے۔ ورنہ وہ صرف ایک بوجھ ڈھونے والے جانور کی مانند رہ جاتا ہے، جس کی کوئی سمت نہیں ہوتی۔

پیغام:
ذمےدار بننے کا مطلب یہ نہیں کہ آپ کبھی غلطی نہ کریں، بلکہ یہ ہے کہ آپ ہمت کے ساتھ اپنی غلطیوں کا سامنا کریں، ان سے سیکھیں اور اپنی زندگی کی باگ خود اپنے ہاتھ میں رکھیں۔ جو فیصلہ آپ خود کرتے ہیں، وہی آپ کی اصل آزادی اور اصل کامیابی کا زینہ بنتا ہے۔