عجمان میں 54 ویں قومی دن کے موقع پر شاندار میوزک نائٹ

rki.news

عجمان (متحدہ عرب امارات) کا 53 واں قومی دن یعنی 2 دسمبر 2025 کو نہایت عقیدت و احترام سے منایا گیا۔ نیشنل ڈے کی خوشیوں کو دوبالا کرنے پنجاب میوزک گروپ کے چیف آرگنائزر اور بانی رکن جناب نزاکت علی خان کی سربراہی میں عظیم الشان میوزک نائٹ کا اہتمام کیا گیا۔ عجمان کے مقامی ایونٹ ہال میں یو اے ای میں مقیم پاکستانی کمیونٹی کی جانب سے بھرپور شرکت اور حوالہ افزائی کی گئی۔

نیشنل ایونٹ میں پاکستان سے شہنشاہ طبلہ عبد الستار خان صاحب (المعروف طاری خان) کے شاگرد خاص نواز استاد نونی خان نے خصوصی شرکت فرمائی۔ شاہینوں کے شہر سرگودھا سے سنگر مسکان جاوید نے اسپشل پرفارمنس سے محفل پر مسکان طاری کر دی۔ مہمان خصوصی جناب عبد اللہ رضوان Juboo, جناب ندیم ایاز صاحب اور جناب ظہور احمد شوکت جمال شامل تھے۔

دیگر فنکاران محفل میں میڈم یاسمین خان، جناب جاوید اختر صاحب، جناب عبداللہ رؤوف صاحب، جناب رانا ارشد صاحب ، میڈم روبہ شاہد اور یو اے ای کی مایہ سنگر میڈم نجمہ مسرت نے اردو ہندی اور عربی فرمائشی نغموں سے خوب لہو گرمایا اور داد سمیٹی۔

چیف آرگنائزر نزاکت علی خان نے کمپئرنگ اور ہوسٹنگ کے فرائض بھی بخوبی ادا کئے۔ حاضرین محفل کی پرزور فرمائش پر نزاکت صاحب نے لائیو اور karoke گیتوں پر شاندار پرفارمنس دی اور ایونٹ کو چار چاند لگا دیے۔ مہمان خصوصی اور اپنے چاہنے والوں کی دلجوئی کے لئے سولو طبلہ نوازی کے چند جوہر بھی بکھیرے جس نے حاضرین پہ رقت و سحر طاری کر دیا۔

عجمان کے سرد موسم میں یہ فیملی ایونٹ رات گئے تک جاری رہا جس میں بار بی کیو سمیت ہائی ٹی کا بندوبست کیا گیا تھا۔ اختتام میں نزاکت صاحب نے فرداً فرداً تمام ارکان محفل کا شکریہ ادا کیا اور پردیس میں یوں پاکستانی گلدستہ ترتیب دینے پر خراج تحسین پیش کیا۔

یو اے ای – پاکستان دوستی زندہ باد