غزل

Poetry - سُخن ریزے , / Friday, December 20th, 2024

تیرا چہرہ مِرے خیالوں میں
چاند روشن ہو جیسے ہالوں میں

زندگی نوحہ گر تھی سڑکوں پر
موت کا رقص اسپتالوں میں

دے رہی تھی جواب خاموشی
ہم الجھتے گئے سوالوں میں

کوئی تیری مثال کیا دیتا
تو کہ بے مثل بے مثالوں میں

دل اندھیروں میں کس کو روتا ہے
ڈھونڈتا ہے کسے اُجالوں میں

جانے کب پگھلے ان کا دل راغبؔ
کب اثر آئے میرے نالوں میں

افتخار راغبؔ
ریاض، سعودی عرب
کتاب: لفظوں میں احساس