*غزل*

Poetry - سُخن ریزے , / Tuesday, February 11th, 2025

جب بھی وہ باغ میں ٹہلتے ہیں
دیکھ کر پھول رشک کرتے ہیں

ضرب سے اک عصا کی ، پتھر سے
چشمۂ آب پھوٹ پڑتے ہیں

ہجر کی ساعتوں میں زخمِ دل
روز سِلتے ہیں روز ادُھڑتے ہیں

عزم ہو گر تو کامیابی کے
راستے خود بخود نکلتے ہیں

کسی بے بس کی آنکھ میں دیکھو
خواب اشکوں میں کیسے ڈھلتے ہیں

کچھ حسیں لوگ اپنے پیراہن
موسموں کی طرح بدلتے ہیں

بھیگ جاتی ہے آنکھ حسرت سے
ہم جب اُس موڑ سے گزرتے ہیں

*شاعرہ تمثیلہ لطیف*