غزل

Poetry - سُخن ریزے , Snippets , / Wednesday, April 24th, 2024

پہلے قدم کوئی بھی اٹھانے نہیں دیا
جب اٹھ گیا تو اس کو بڑھانے نہیں دیا

اس نے تو اپنی داستاں کردی بیاں مگر
ہم کو ہمارا درد سنانے نہیں دیا

طوفاں کی جستجو تھی بجھادے چراغ دل
لیکن چراغ ہم نے بجھانے نہیں دیا

تلوے کسی کے چاٹ کے پاؤں بلندیاں
اتنا کمال مجھ کو خدا نے نہیں دیا

رہبر ہماری قوم کو ایسے ملے یہاں
جاگے نہ خود کسی کو جگانے نہیں دیا

معلوم ہو اسے بھی اندھیروں کا بانکپن
یہ سوچ کر چراغ جلانے نہیں دیا

کوشش تو اس نے کی تھی نشانہ لگائیں گے
تم نے مگر وہ تیر چلانے نہیں دیا

بغض و حسد تو دل میں رہا عمر بھر مگر
حسنِ سلوک دل میں سمانے نہیں دیا

ارشاد عاطفؔ احمدآباد انڈیا