غزل

Poetry - سُخن ریزے , Snippets , / Sunday, March 9th, 2025

لگتے ہیں دن حیات کے دُشوار سے مجھے
تم نے لگا دیا ہے یوں دیوار سے مجھے

تعویذ کوئی کارگر نہ ہی کوئی دوا
ملنی شفا ہے بس ترے دیدار سے مجھے

ضدی ہے انتہا کا وہ ، میں بھی انا پرست
مجھ سے گلے ہیں یار کو ، اور یار سے مجھے

لیتی ہیں جان یہ ترے لہجے کی تلخیاں
دیتا ہے زخم کس لیے تلوار سے مجھے

شاید خرید لیتا میں دے کر کوئی بھی دام
لیکن وفا نہ مل سکی بازار سے مجھے

آنکھوں سے تیری پڑھ چکا ہوں حالِ دل ترا
لگتا نہیں ہے ڈر ترے انکار سے مجھے

اوجھل ہوا ہے آنکھ سے جب سے وہ مہ جبیں
لگنے لگے ہیں آئنے بے کار سے مجھے

قدموں میں ہی گزار دوں اس کے میں زندگی
ذُلفی اگر پکار لے وہ پیار سے مجھے

ذوالفقار علی ذُلفی
( پنڈ دادنخان جہلم )