غزل

Poetry - سُخن ریزے , / Tuesday, March 11th, 2025

خواب زاروں میں کبھی چھوڑ آئیں ماں کی لوریاں
جاگی آنکھوں کو غنودہ کر رہی ہیں تھپکیاں

قربتوں میں جب بدل جانے لگی ہیں دوریاں
پھر ہری ہونے لگی ہیں چاہتوں کی ٹہنیاں

دور پربت سے اتر کر چھاگئی ہیں بدلیاں
کیوں ہوائیں لے کے اُڑ جانے لگی ہیں چُنریاں

ہوگیا بوجھل اچانک دل ، گلا بھی رُندھ گیا
جب شجر کو یاد آئیں پنچھیوں کی بولیاں

عصمتیں بھی جن کے آگے ہیچ لگتی ہیں کبھی
بھوک جب بے چین کر جاتی ہیں اکثر روٹیاں

بھوک پھر رسی پہ چلوائے گی مفلس کو اُدھر
اور اِدھر کچھ دیر پھر بجنے لگیں گی تالیاں

کیسے ، من مانی سے وہ باز آئے تمثیلہ بھلا !
چاہے لاکھ انکار سے ہِلنے لگی ہوں بالیاں

*شاعرہ تمثیلہ لطیف*