غزل

Poetry - سُخن ریزے , Snippets , / Tuesday, April 22nd, 2025

rki.news

نمی آنکھ میں اور ہنسی کا سفر
بڑا ہے کٹھن زندگی کا سفر

کہاں مجھ کو لے جاٸے اب دیکھیے
مرا یہ سفر بے خودی کا سفر

کہیں تو ملے میرے دل کو قرار
کہیں تو تھمے بے کلی کا سفر

دوبارہ وہ صورت دکھاٸی نہ دی
کیا بار ہا اس گلی کا سفر

اڑا آسماں کی بلندی میں وہ
کیا جس نے بھی عاجزی کا سفر

میں سمجھا تھا پھولوں کا بستر مگر
تھا کانٹوں سے پر زندگی کا سفر

مری آنکھ کی روشنی لے گیا
مسلسل سفر تیرگی کا سفر

یہاں سانس لینا روا تک نہیں
میاں حبس ہے عاشقی کا سفر

ہے ممکن میں کھو جاٶں راحل کہیں
کہ در پیش ہے آگہی کا سفر

شاعر۔علی رَاحِلؔ
پاکستان پنجاب بورے والا