غزل

Poetry - سُخن ریزے , Snippets , / Monday, July 14th, 2025

rki.news

آج قسمت کا بھی یہ بوجھ اٹھایا میں نے
مانگ کر اس کو دعا میں بھی نہ پایا میں نے

جب بھی محفل میں اسے اپنی بلایا میں نے
اپنے سر پر کوئی الزام لگایا میں نے

پہلے احساس کے ہاتھوں سے جھنجوڑا ہے اسے
چاند پھر چھت پہ کئی بار بلایا میں نے

شہرتیں پھر بھی نہ حاصل ہوئیں یارو مجھ کو
ساری دنیا کو ہنر اپنا دکھایا میں نے

مانگنے سے کہیں بہتر ہے کہ بھوکے رہنا
اپنے بچوں کو ہمیشہ یہ سکھایا میں نے

رکھ دیا اس نے جلا کر ہی نشیمن میرا
آئینہ جب کبھی سورج کو دکھایا میں نے

قابلِ داد غزل میری نہیں ہے مانا
شعر ہر ایک مگر اپنا سنایا میں نے

روشنی غیر کو دینے لگا جب سے عاطفؔ
خود چراغ اپنا ہی اے دوست بجھایا میں نے

ارشاد عاطفؔ احمدآباد انڈیا