غزل

Poetry - سُخن ریزے , Snippets , / Sunday, August 3rd, 2025

rki.news

جب طبیعت مری مائل بہ سخن ہوتی ہے
پھر غزل میری بہت مست مگن ہوتی ہے

اس کی انمول ہوا کرتی ہے قیمت صاحب
جب کسی چیز کی ہر وقت جتن ہوتی ہے

تب معانی و مفاہیم کی ہوتی ہے پرکھ
جب غزل پیش سر بزم سخن ہوتی ہے

اج کے بچے تو تلوار لئے پھرتے ہیں
جانے کیوں ان کو کھلونوں سے گھٹن ہوتی ہے

درمیاں چاند ستاروں کے چھپی ہے وہ کہیں
اس کی یادوں سے مرے دل میں چبھن ہوتی ہے

شمع حکمت سے ضیاء بار ہے سینہ میرا
فکر جیسے کوئی سورج کی کرن ہوتی ہے

نیند میں خواب تو ہوتے ہیں سہانے لیکن
آنکھ کھلتی ہے تو صدیوں کی تھکن ہوتی ہے

جس کی خوشبو سے معطر ہے مرا گھر آنگن
وہ کوئی بیٹی یا ننھیں سی بہن ہوتی ہے

جوکسی اور کی معصوم سی بیٹی ہے وہی
کل کسی اور کی منصور دلھن ہوتی ہے

منصور اعظمی دوحہ قطر