غزل

Poetry - سُخن ریزے , Snippets , / Wednesday, October 15th, 2025

rki.news

وہ مَحبَّت جو کبھی خواب ہُوا کرتی تھی
تیرے پہلو میں وہ زَرنَاب ہُوا کرتی تھی

اِک تِرا خَال تھا اُسلُوبِ نِگارِش میرا
اِک تِری زُلف کہ اِعراب ہُوا کرتی تھی

تیرے اَبرُو سرِ اِمکان ہُوا کرتے تھے
چشمِ مائل پَئے اِیجاب ہُوا کرتی تھی

تیرا لَہجہ کبھی زَہرآب نہ تھا میرے لیے
تیری آنکھوں میں مَئے نَاب ہُوا کرتی تھی

تُو گیا ہے تو اَماوَس کی سَمَجھ آئی ہے
ورنہ ہر شَب ، شَبِ مَہتاب ہُوا کرتی تھی

سلیم کاوش