غزل

Poetry - سُخن ریزے , Snippets , / Tuesday, November 4th, 2025

rki.news

مجھے یہ پوچھنا ہے آسماں سے
وہ کیا لے کر گیا ہے اس جہاں سے

پکارا ہی نہیں اس نے وہاں سے
تو پھر کس طرح جائیں ہم یہاں سے

چمن خود اپنے ہاتھوں سے اجاڑا
شکایت کیا کریں اس باغباں سے

وہ اپنے ساتھ میں لیکر گیا ہے
بہاریں میری قسمت کی جہاں سے

نہ بدلیں گے کبھی ہم چال اپنی
بچھڑ جائیں بھلے ہم کارواں سے

جنھیں کل ناز تھا قوت پہ اپنی
نظر آنے لگے کیوں ناتواں سے

اکٹھی کر رہا ہے دولتیں وہ
اسے جانا نہیں ہے کیا جہاں سے

اب اس کردار کا کیا ذکر کرنا
جو عاطفؔ کٹ گیا ہے داستاں سے

ارشاد عاطفؔ احمدآباد انڈیا