غزل

Poetry - سُخن ریزے , / Monday, November 17th, 2025

rki.news

میرے پاس آؤ ، مری ذات کو بے کل کر دو
میرے محبوب ! مجھے اب تو مکمل کر دو

میں کسی ہوش و توجہ کی نہ محتاج رہوں
پیار میں اپنے ، کچھ اِس طرح سے پاگل کر دو

چاہتی ہوں کہ معطر رہوں اِس خوشبو سے
تم ذرا لمس سے اپنے مجھے صندل کر دو

لے اُڑو ! شوخ فضاؤں میں ہَوا بن کے کبھی
اپنے ہم راہ مجھے لے چلو ، بادل کردو

درمیاں میں نہ ہوا بھی رہے ہم دونوں کے
اپنی آغوش میں بھر کر ، مجھے مخمل کر دو

تشَنگی کا مجھے تا عمر نہ احساس ہو پھر
پیار کی بوندوں سے تن من مرا ، جل تھل کر دو

دھند کی طرح مجھے اوڑھ رکھو گرد اپنے
ایسے لپٹاؤ ، کہ جزدان سے افضل کر دو

تمثیلہ لطیف