فتح میزائل کا کامیاب تجربہ: پاکستان کا دفاع مظبوط ہاتھوں میں

Articles , Snippets , / Tuesday, May 6th, 2025

rki.news

تحریر: احسن انصاری

پاکستان نے ایک اور سنگ میل عبور کرتے ہوئے 5 مئی 2025 کو جدید ترین “فتح” میزائل کا کامیاب تجربہ کیا، جو زمین سے زمین تک مار کرنے والا ہتھیار ہے اور 120 کلومیٹر تک اپنے ہدف کو نہایت درستگی کے ساتھ نشانہ بنانے کی صلاحیت رکھتا ہے۔ یہ میزائل جدید نیویگیشن سسٹم، تیز رفتاری، اور خودکار کنٹرول ٹیکنالوجی سے آراستہ ہے، جس نے پاکستان کے دفاعی نظام میں ایک نئی جہت کا اضافہ کر دیا ہے۔

یہ تجربہ پاک فوج کی جانب سے جاری “ایکسسرسائز انڈس” کے تحت کیا گیا، جس کا مقصد دفاعی مشقوں کے ذریعے نہ صرف فوجی تیاری کو پرکھنا ہے بلکہ اسٹریٹجک ہتھیاروں کی مؤثریت کو بھی جانچنا ہے۔ اس کامیاب تجربے نے یہ ثابت کر دیا کہ پاکستان اپنے دفاع کے معاملے میں نہ صرف مکمل طور پر تیار ہے بلکہ کسی بھی بیرونی جارحیت کا بھرپور جواب دینے کی مکمل صلاحیت بھی رکھتا ہے۔

“فتح” میزائل کو پاکستانی انجینئروں اور دفاعی سائنسدانوں نے جدید تقاضوں کے مطابق تیار کیا ہے۔ اس کی رینج 120 کلومیٹر ہے، جو کہ قریبی اور درمیانی فاصلے کے ہدف کو نشانہ بنانے کے لیے انتہائی موزوں ہے۔ اس میں نصب جدید گائیڈنس سسٹم اور خودکار کنٹرول فیچر اسے ایک ‘سمارٹ میزائل’ بناتے ہیں، جو روایتی ہتھیاروں کے مقابلے میں کہیں زیادہ درست اور موثر ہے۔

ماہرین کے مطابق یہ میزائل کسی بھی فوجی تنازعے میں نہایت اہم کردار ادا کر سکتا ہے، خصوصاً جب دشمن کی افواج یا تنصیبات قریبی حدود میں موجود ہوں۔ اس کی تیز پرواز، کم وقت میں ہدف تک پہنچنے کی صلاحیت، اور کم از کم ردعمل وقت اسے دشمن کے لیے خطرناک ترین بناتے ہیں۔

اس میزائل تجربے کے دوران پاکستان آرمی کے سینیئر افسران، اسٹریٹجک پلانز ڈویژن کے نمائندگان، اور دفاعی ٹیکنالوجی کے ماہرین موجود تھے، جنہوں نے تجربے کی مکمل نگرانی کی۔ تجربہ نہ صرف کامیاب رہا بلکہ اس نے تمام مقررہ تکنیکی اور عسکری مقاصد حاصل کیے۔

آئی ایس پی آر کے مطابق، تجربے کا مقصد نہ صرف تکنیکی کارکردگی کا جائزہ لینا تھا بلکہ فوج کی آپریشنل تیاری کو جانچنا بھی تھا۔ یہ ایک پیغام بھی تھا کہ پاکستان کسی بھی جارحیت کا مقابلہ کرنے کے لیے ہر لمحہ تیار ہے۔

یہ میزائل تجربہ ایک ایسے وقت میں کیا گیا ہے جب پاکستان اور بھارت کے درمیان کشیدگی میں اضافہ دیکھنے میں آ رہا ہے۔ 22 اپریل 2025 کو بھارت کے زیر انتظام کشمیر کے علاقے پہلگام میں ایک دہشت گرد حملے کے نتیجے میں 26 افراد ہلاک ہو گئے تھے۔ بھارت نے اس حملے کا الزام پاکستان پر عائد کیا، جسے پاکستان نے سختی سے مسترد کیا ہے۔

اس کے بعد بھارت نے کئی اہم اقدامات کیے، جن میں انڈس واٹر ٹریٹی کی معطلی، ویزہ سہولیات کی بندش، اور دوطرفہ تجارتی روابط کو محدود کرنا شامل ہے۔ اس تناظر میں فتح میزائل اور دو روز قبل آزمائے گئے عبدالی میزائل کے تجربے کو پاکستان کی عسکری تیاری اور پیغام رسانی کے طور پر دیکھا جا رہا ہے۔

اگرچہ میزائل تجربات کو اکثر جارحیت یا طاقت کے اظہار کے طور پر دیکھا جاتا ہے، لیکن پاکستان کا مؤقف ہمیشہ یہی رہا ہے کہ وہ ایک پرامن ملک ہے اور اپنے دفاع کو ناقابلِ تسخیر بنانے کی پالیسی پر کاربند ہے۔ “فتح” میزائل کا تجربہ بھی اسی پالیسی کا تسلسل ہے، جس کا مقصد دشمن کو خوف زدہ کرنا نہیں بلکہ قومی دفاع کو مضبوط بنانا ہے۔

وزیراعظم شہباز شریف نے تجربے پر قوم کو مبارکباد دیتے ہوئے کہا کہ “پاکستان کا دفاع مضبوط ہاتھوں میں ہے، اور قوم اپنے محافظوں پر فخر کرتی ہے۔ ہم امن چاہتے ہیں لیکن اگر دشمن نے ہم پر جنگ مسلط کی تو ہم بھرپور جواب دینے کی صلاحیت رکھتے ہیں۔”

خطے میں بڑھتی ہوئی کشیدگی کے باعث عالمی برادری نے بھی صورتِ حال پر تشویش کا اظہار کیا ہے۔ ایران نے دونوں ممالک کے درمیان ثالثی کی پیشکش کی ہے، جبکہ روس نے صبر و تحمل کا مظاہرہ کرنے کی اپیل کی ہے۔ پاکستان، سفارتی محاذ پر بھی فعال ہے اور اقوامِ متحدہ کی سلامتی کونسل کو باقاعدہ طور پر خطے کی صورتحال سے آگاہ کرنے کا فیصلہ کر چکا ہے۔

“فتح” میزائل کا کامیاب تجربہ پاکستان کی دفاعی ترقی، عسکری تیاری، اور خود انحصاری کا مظہر ہے۔ یہ تجربہ نہ صرف ایک ٹیکنالوجیکل کامیابی ہے بلکہ یہ ایک سیاسی و عسکری پیغام بھی ہے کہ پاکستان ایک ذمے دار ایٹمی ریاست ہے جو خطے میں امن چاہتی ہے، مگر اپنے دفاع پر کبھی سمجھوتہ نہیں کرے گی۔

پاکستان نے دنیا کو یہ باور کرا دیا ہے کہ وہ اپنی سرحدوں کی حفاظت اور قومی سلامتی کے لیے ہر ممکن اقدام کرے گا۔ فتح میزائل صرف ایک ہتھیار نہیں، بلکہ یہ پاکستان کی نظریاتی اور دفاعی خودمختاری کا روشن استعارہ ہے۔
“پاکستان زندہ باد”