ماں کے نام غزل

Poetry - سُخن ریزے , / Wednesday, February 12th, 2025

مصحف جیسا ماں کا چہرہ لگتا ہے
بند عبا کا اک تعویذ سا لگتا ہے

جب بھی دم کرتی ہے مجھ پر جاتے وقت
اک اک جملہ آیت جیسا لگتا ہے

مشک کی مانند اسکے پیکر کی خوشبو
اسکا سایہ عکس خدا کا لگتا ہے

اس کی ممتا پربت کی صبحوں جیسی
آنچل اس کا چاند کا ہالہ لگتا ہے

ٹھنڈی اوس کا لمس ہے اسکے ہاتھوں میں
غارِ حرا سا اس کا کمرا لگتا ہے

شہد کی لذت ہے باتوں میں تمثیلہ
امرت جیسا اس کا لہجہ لگتا ہے

تمثیلہ لطیف