نزاکت علی خان کا حسب معمول لیجنڈز ٹریبیوٹ نائٹ کا اہتمام

سال نو 2025 کے سرد جھاڑوں کو گرمانے کو پنجاب میوزک گروپ (پی ایم جی) انٹرنیشنل کے روں رواں اور چیف آرگنائزر جناب نزاکت علی خان نے حسب معمول لیجنڈز ٹریبیوٹ نائٹ کا اہتمام کیا۔

فن موسیقی و گائیکی کا یہ سہرا پی ایم اور حاوی نیوز نیٹورک کے مشترکہ تعاون سے سجایا گیا۔ پروگرام پاکستان کے دل شہر لاہور کے پنجاب آرٹ کمپلیکس قذافی اسٹیڈیم کے پروقار مقام پر ترتیب دیا گیا جسے مقامی ریڈیو و ٹی وی کے علاؤہ انٹرنیشنل وی لاگرز نے بھی براہِ راست نشر اور ریکارڈ کیا۔

پروگرام کا ٹائٹل “گیت ہمارے آواز آپکی” کے بینر تلے تخلیق کیا گیا تھا۔ اردو اور پنجابی گلوکاروں، فنکاروں اور شوبز ستاروں کی ملک پاکستان کو گراں قدر خدمات کے عوض یہ عالیشان محفل مشترکہ طور پر قابل عمل بنائی گئی تھی۔ دلوں کی دھڑکن میں بسنے والےجن میں شہنشاہ غزل مہدی حسن خان، ملکہ ترنم نور جہاں، معراج قوالی استاد نصرت فتح علی خان، کامیڈی کنگ البیلا صاحب، رستم طبلہ استاد عبد الستار طاری خاں کو خصوصاً اظہار عقیدت پیش کیا گیا اور انہی کے نقش قدم کو شعار بنانے کا مشن بھی تھا۔

پروگرام کا باقاعدہ آغاز قوالی اور صوفیانہ کلام سے ہوا۔ نزاکت صاحب نے کمپئرنگ اور اینکر پرسن کا کردار بھی بخوبی ادا کیا۔پروگرام کے لئے انٹرنیشنل پرفارمرز میں خصوصی شرکت یو کے سے جناب محمد صابر مرزا صاحب، سعودی عرب سے جناب شبیر شوکت علی نے کی۔ دیگر فنکاران میں شعیب ناگی، شوکت ناگی، منیر حسین، معصوم علی شاہ، شازیہ عباس، یمنی طاہر، کرن شہزادی، رضوانہ تنویر اور دعا قاسم علی شامل تھے۔ چیف گیسٹس میں جناب ہنی البیلا، اسد کیفی صاحب، ڈاکٹر ندیم بھٹی، نثار احمد قادری، شفاقت علی، محمد شفیق، ارشاد علی، قمر عباس اور جناب ندیم پہلوان شامل تھے۔ جو اس رنگا رنگ تقریب سے خوب محظوظ ہوئے اور نمایاں ابھرتے ہوئے ستاروں میں ایوارڈز اور کیش انعامات بھی تقسیم کیے۔

پروگرام کے دیگر اسپانسرز میں سید ناصر حکیم، محمد ایوب شیخ (قصور سویٹس)، عمران بوبی ساؤنڈ اینڈ ڈی جے سروسز اور دبئی سے شفیق احمد نے خصوصی تعاون فرمایا۔

پروگرام حکومت پنجاب کے طے شدہ ٹائم فریم یعنی شام 6 سے رات 10 بجے تلک جاری رہا۔ فیملی انٹرٹینمنٹ کی ایسی سرگرمیوں کو مزید رونق افروز کرنے کے لئے ہائی ٹی ڈنر اور چائے کافی کا بندوبست بھی ملحوظ خاطر رکھا گیا تھا۔ اختتام پر حاضرین نے پی ایم اور نزاکت صاحب کا شکریہ ادا کیا اور لیجنڈز کو دلوں میں دوبارہ زندہ کرنے پر دل کی گہرائیوں سے مبارکباد پیش کی۔ پی ایم جی آئندہ بھی ایسے ہی ایونٹس پیش کرتا رہے گا اور پوری دنیا میں اپنی پہچان بنائے گا۔