پاکستانی طالب علم عبدالرّافع پراچہ نے انٹرنیشنل بایولوجی اولمپیاڈ 2025 میں طلائی تمغہ حاصل کیا

Events - تقریبات , Snippets , / Monday, August 4th, 2025

rki.news

راولپنڈی (4 اگست 2025) — پاکستان نے بین الاقوامی تعلیمی میدان میں ایک تاریخی کامیابی حاصل کی ہے، جب صدیق پبلک اسکول و کالج راولپنڈی کے ہونہار طالب علم عبدالرّافع پراچہ نے فلپائن میں منعقدہ 36ویں انٹرنیشنل بایولوجی اولمپیاڈ (IBO 2025) میں طلائی تمغہ جیت کر ملک کا سر فخر سے بلند کر دیا۔

یہ پاکستان کی IBO میں شرکت کی 19 سالہ تاریخ کا پہلا گولڈ میڈل ہے۔ عالمی سطح پر منعقدہ اس مقابلے میں 80 سے زائد ممالک کے 300 سے زائد باصلاحیت طلبہ نے شرکت کی، جن میں حیاتیات کے مختلف شعبہ جات جیسے جینیٹکس، مالیکیولر بایولوجی، فزیالوجی اور ایکالوجی میں مہارت کا مظاہرہ کیا گیا۔

عبدالرّافع کی یہ کامیابی نہ صرف ان کی ذاتی محنت، ادارے کی رہنمائی اور اہلِ خانہ کے تعاون کا نتیجہ ہے بلکہ PIEAS، HEC اور STEM کیریئرز پروگرام کی جانب سے فراہم کردہ بین الاقوامی معیار کی تربیت کا بھی ثبوت ہے۔

صدرِ پاکستان اور وزیرِاعظم سے مطالبہ کیا جا رہا ہے کہ وہ عبدالرّافع پراچہ کی اس شاندار کامیابی پر انہیں قومی اعزازات سے نوازیں، تاکہ نوجوانوں میں سائنسی تعلیم و تحقیق کی حوصلہ افزائی ہو سکے۔

یہ تاریخی کامیابی پاکستان کے لیے امید کا ایک روشن پیغام ہے اور اس بات کا ثبوت ہے کہ پاکستانی نوجوان عالمی میدان میں کسی سے کم نہیں۔