یارانِ ادب

Events - تقریبات , Snippets , / Sunday, March 9th, 2025

آہ، جنابِ شوکت جمال

ریاض سعودی عرب سے ممتاز شاعر محترم خورشید الحسن نیر کی اطلاع کے بموجب معروف طنز و مزاح کے شاعر و ادیب جنابِ شوکت جمال کا کل رات یعنی 7 مارچ 2025 عیسوی کو اسلام آباد میں انتقال ہو گیا- جناب شوكت جمال کم و بیش نصف صدی سعودی عرب میں مقیم رہے-

انا للہ وانا الیہ راجعون

جنابِ شوکت جمال حمد، نعت، سنجیدہ اور شگفتہ غزلیں، قطعات، پیروڈی، نظموں کے علاوہ طنزیہ اور مزاحیہ مضامین بھی لکھتے تھے۔ عرصہ دراز تک سعودی عرب میں اردو کی خدمت کرتے رہے، مزاحیہ شاعری کے حوالے سے منفرد شناخت رکھتے ہیں، انہیں اسمِ بامسمی کہا جاسکتا ہے، ان کے قطعات اور غزلیات حسن و جمال اور شان و شوکت سے مزین ہیں۔ کتابیں ”دیوانچہ”، ”شوخ بیانی”، ”یہ وسائل تبسم”، “ایک لوہار کی” اور “تیوہار” منظرِ عام پر آچکے ہیں-

بطور خراج تحسین میں نے قطعہء تاریخ وفات کہا اور پیش کیا ہے، قطعہ کے آخری مصرع سے بحوالہ علم الاعداد/علم الابجد/حساب الجُمّل، سالم الاعداد تاریخ 2025 عیسوی حاصل ہوتی ہے.

اس امید کے ساتھ ارسال کر رہا ہوں کہ یہ قطعہ جہاں تک پہنچے وہاں تک مرحوم کے لئے دعائے مغفرت کا محرک بنے۔

اللہ تعالیٰ مرحوم کی مغفرت فرمائے، تمام لواحقین، محبین اور اہل خاندان کو صبر جمیل عطا فرمائے۔ آمین

قطعہء تاریخِ وفات
برائے
جنابِ شوکت جمال

***

خوش کلام و خوش طبیعت، خوش نگار و خوش مقال

آہ، کیوں داغِ جدائی دے گئے شوکت جمال

لٹ گئی اہلِ ادب کی مُسکراہٹ کی مَتاع

ہے خسارہ عالمِ اردو کا، شوکت کا وصال

مصرعہ تاریخِ رحلت تحفہ نایاؔب ہے

:شاعرِ “اعلیٰ مزاح و طنز” تھے شوکت جمال:

2025 عیسوی

دعا گو
مظفر نایابؔ
دوحہ قطر