(یوم عالمی خواتین کے موقعے پر خصوصی نظم) تنبیہ

Poetry - سُخن ریزے , Snippets , / Sunday, March 9th, 2025

شازیہ عالم شازی

نہیں پروا کوئی زمانے کی
کون کیا سوچتا ہے کس کے لیے
مقصدِ زیست کامیابی ہے
وقت کیا چاہتا ہے کس کے لیے
صنفِ نازک ہوں یوں تو کہنے کو
حوصلے ہیں چٹان کے مانند
ہے گھنا میری سوچ کا سایہ
نیلگوں آسمان کے مانند
اپنے ہونے پہ فخر ہے مجھ کو

یہ تو ہر دور کی کہانی ہے
کبھی نفرت ، کبھی پذیرائی
ہم کو ہر عہد میں ہوئی حاصل
کبھی راحت، کبھی یہ رسوائی
اس کا ہرگز نہیں ہے یہ مطلب
حوصلے اپنے چھوڑ بیٹھوں میں
جس سے رشتوں کا مان ہو قائم
اس سے رشتہ ہی توڑ بیٹھوں میں
وقت کی تیز آندھیوں میں یہاں
چاہتوں کے دیے جلاتی ہوں
اپنے ہونے پہ فخر ہے مجھ کو

پاس رکھتی ہوں علم و حکمت کا
ہر کسی سے الجھ نہیں سکتی
میں ستاروں کے درمیاں رہ کر
روشنی سے الجھ نہیں سکتی
میری تہذیب کا تقاضا ہے
خامشی کی زباں میں بات کروں
بھول کر بھی مری خموشی کو
اب یہاں شور نہ سمجھا جائے
لڑنا آتا ہے اپنے حق کے لیے
مجھ کو کمزور نہ سمجھا جائے