غزل

Poetry - سُخن ریزے , / Sunday, September 1st, 2024

میں ترا درد بھی مسکان میں رکھ لیتا ہوں
مثل سوغات وہ احسان میں رکھ لیتا ہوں

کچھ تو کمرے میں ترے جسم کی خوشبو آئے
تری تصویر کو گلدان میں رکھ لیتا ہوں

جب گذرتا ہوں ترے کوچہ و بازاروں سے
میں تری دید کو امکان میں رکھ لیتا ہوں

کسی مشکل سے نکلنا ہو تو آسانی کو
“ماں”ترا چہرہ میں وجدان میں رکھ لیتا ہوں

ہمسفر بن کے مرا ساتھ نبھائیں جاذب
تری یادوں کو میں سامان میں رکھ لیتا ہوں

#ڈاکٹر ظفر جاذب #