مزاحیہ غزل

Poetry - سُخن ریزے , / Thursday, December 12th, 2024

پِٹ کے آئے ہو اپنے سالے سے
تبصرہ کوئی اس حوالے سے

سننے آئے ہیں لوگ نثری نظم
کچھ سنا دیجیے مقالے سے

جو چُرائے مری غزل یارب
بھر دے اس کی زبان چھالے سے

میں بھی ڈرتا ہوں ننھے بچوں سا
چیخ کر شعر پڑھنے والے سے

اک ذرا سرچ کر لو گوگل پر
جب غزل لو کسی رسالے سے

بیویاں حکمراں ہیں شوہر پر
کنجیاں کھُل رہی ہیں تالے سے

اُن کو دیکھا بغیر میکپ کے
خوف کھانے لگا اجالے سے

کیوں سمجھتے ہو بھانڈ کو شاعر
کام سوئی کا مت لو بھالے سے

کیوں صفائی پہ دے رہے ہو دھیان
چاے کیسے پکے گی نالے سے

بات کی پھر کوئی حماقت کی
دھیان بھٹکا دیا گھوٹالے سے

چینی مشروم کھا رہے ہو کیا
گورے ہونے لگے ہو کالے سے

دیکھ جاتے ہیں اب کہاں راغبؔ
گھوم کر آگئے ہمالے سے

افتخار راغبؔ
ریاض، سعودی عرب