نیا سال2025

Poetry - سُخن ریزے , / Tuesday, December 31st, 2024

چلو ڈھونڈ لائیں وہ بھارت پُرانا

وہ خُلقِ غنیمت شکارِ نظر ہے
تعلق ہمارا شکارِ سِحر ہے
مزہ زندگی میں کہاں اب بچا ہے
تعصب کا یہ کھیل کس نے رچا ہے
وطن کو نہ بدنام کردے چلن یہ
ہے بھارت مکمل ہی باغِ عدن یہ
موافق نہیں گرچہ حالات پھر بھی
مطابق نہیں ہیں خیالات پھر بھی
چراغِ یقیں ہم جلاتے رہیں گے
کہ مایوسیوں سے بچاتے رہیں گے
بزرگوں کا اپنے اثاثہ وطن ہے
کہ دلکش ہمارا جو گنگ و جمن ہے
اخوّت رہے تو وطن بھی رہے گا
سلامت وہ رنگِ کُہن بھی رہے گا
چلو ڈھونڈ لائیں وہ بھارت پُرانا
اخوّت کا گُم ہوگیا ہے خزانہ
خدا توُ وطن پر خصوصی کرم کر
ہمیں ایک عاشق وطن کو صنم کر