غزل

Poetry - سُخن ریزے , / Monday, January 20th, 2025

یہ جو پابندیاں ہیں چاہت پر
جیسے پہرے ہیں گُل کی رنگت پر

تیری مرضی عزیز ہے یا رب
وقت ہنستا ہے میری غربت پر

میرا شیوہ نہیں ہے نوحہ گَری
صبر کرتی ہوں ہر مصیبت پر

میری اردو ادب سے نسبت ہے
اور میں نازاں ہوں اپنی نسبت پر

میری جنت ہے روضۂ اقدس
ناز ہے مجھ کو اپنی قسمت پر

عام ہو جائے جس سے عریانی
خاک ڈالوں گی ایسی جدت پر

میں نے سیکھا ہے تم سے تمثیلہ
سجدہ ریزی سخن کی رفعت پر

تمثیلہ لطیف