*رات کا سماں

Poetry - سُخن ریزے , / Monday, February 10th, 2025

میں بھی تو پریشاں ہوں
تو بھی مضطرَب ہوگا

تجھ سے رو بہ رو ملنا
کون جانے کب ہوگا

ہر گھڑی جدائی کی
بے قرار گزرے گی

اس برس کی بارش جب
آنگنوں میں برسے گی

پیاسے دل کی فرمائش
اک دبی ہوئی خواہش

سوندھی سوندھی مٹی کی
خوشبوؤں کو ترسے گی

خامشی ہے ہونٹوں پر
پھر بھی تھرتھرائیں گے

تازہ تازہ پھولوں کے
لمس یاد آئیں گے

رت جگوں کی سرحد سے
خواب لَوٹ جائیں گے

نیل گوں ردا اوڑھے
سونا آسماں ہوگا

رات کا سماں ہو گا
جانے تو کہاں ہوگا

تمثیلہ لطیف