غزل

Poetry - سُخن ریزے , / Wednesday, October 1st, 2025

rki.news

اِک چہرہ نایاب دِکھائی دیتا ہے
خوابوں میں بھی خواب دِکھائی دیتا ہے

اب تو سب کچھ واضح ہے اے پاگل دل
اب بھی کیوں بے تاب دِکھائی دیتا ہے

پہلی چاہت کا ننھّا سا پودا بھی
جیون بھر شاداب دِکھائی دیتا ہے

دیکھو کس کے جلووں کی تابانی ہے
روشن کیوں ہر باب دِکھائی دیتا ہے

بستی کوئی بستی ہے جب سپنوں کی
بے موسم سیلاب دِکھائی دیتا ہے

دل کشتی میں تیری محبت کی پتوار
گردش میں گرداب دکھائی دیتا ہے

آنکھوں میں جب راغبؔ اُن کا چہرہ ہو
پھر کس کو مہتاب دِکھائی دیتا ہے

افتخار راغبؔ
کتاب: لفظوں میں احساس