شادی سے پہلے ذہنی و نفسیاتی صحت کو نظرانداز نہ کریں

Articles , Snippets , / Wednesday, October 1st, 2025

rki.news

تحریر: طارق محمود
میرج کنسلٹنٹ
ایکسپرٹ میرج بیورو انٹرنیشنل
03132009181
بیٹی کی شادی والدین کے لیے زندگی کے سب سے اہم فیصلوں میں سے ایک ہے۔ اکثر اوقات خاندان تعلیمی قابلیت، مالی حیثیت اور خاندانی پس منظر پر زیادہ توجہ دیتا ہے، لیکن حقیقت یہ ہے کہ لڑکے کی ذہنی اور نفسیاتی صحت کو جانچنا بھی نہایت ضروری ہے۔
میریج کنسلٹنٹ کے طور پر میرا مشورہ ہے کہ شادی کی تاریخ طے کرنے سے پہلے لڑکے سے چند ملاقاتیں ضرور کریں۔ گفتگو اور رویے سے اندازہ لگایا جا سکتا ہے کہ وہ ذہنی طور پر متوازن ہے یا نہیں۔ یاد رکھیں کہ نفسیاتی مسائل میں جنسی مسائل بھی شامل ہو سکتے ہیں، اور اگر ان کا بروقت ادراک نہ کیا جائے تو ازدواجی زندگی متاثر ہونے کا خطرہ بڑھ جاتا ہے۔
بدقسمتی سے ہمارے معاشرے میں مرد اپنی ذہنی یا جنسی مشکلات پر بات کرنے میں ہچکچاہٹ محسوس کرتے ہیں۔ اکثر وہ ان مسائل کو چھپاتے ہیں، اور پھر شادی کے بعد مشکلات سامنے آنے لگتی ہیں۔ ایسے حالات نہ صرف میاں بیوی کے تعلقات پر بوجھ ڈالتے ہیں بلکہ خاندانوں میں بھی کشیدگی پیدا کرتے ہیں۔
اس کے ساتھ ہی یہ بات بھی قابل غور ہے کہ بعض اوقات شادی میں تاخیر گھر کی خواتین کی غیر ضروری تنقید یا بے جا اعتراضات کی وجہ سے ہوتی ہے۔ ایسے ماحول میں نوجوان لڑکے اپنی توانائی غیر صحت مند سرگرمیوں پر ضائع کر دیتے ہیں، جس کے منفی اثرات ان کی ازدواجی زندگی پر پڑتے ہیں۔
پاکستانی معاشرے میں جگہ جگہ مردانہ کمزوری کے اشتہارات اس بات کا ثبوت ہیں کہ یہ مسئلہ صرف ایک وہم نہیں بلکہ ایک حقیقی حقیقت ہے۔ ضرورت اس امر کی ہے کہ ہم ان موضوعات پر سنجیدگی سے بات کریں اور والدین اپنے بچوں کے لیے فیصلے کرتے وقت ان پہلوؤں کو بھی مدنظر رکھیں۔
میری رائے میں کامیاب ازدواجی زندگی صرف مالی یا تعلیمی معیار سے ممکن نہیں بلکہ ذہنی سکون، جذباتی ہم آہنگی اور نفسیاتی توازن بھی اتنے ہی اہم ہیں۔