غزل(غالب کی زمین میں)

Poetry - سُخن ریزے , Snippets , / Monday, October 13th, 2025

rki.news

لبوں پہ ہے تِرے مسکان ایسی کیا کہیے
صدائے چشم کُشا تیری ہر ادا کہیے

کہاں تلک ہو مداوا طبیب سے آخر
ہمارے واسطے اس درد کو دوا کہیے

اگر نگاہ کسی اجنبی پہ ٹک جاۓ
تو کیا اسے بھی بھلا دوست و آشنا کہیے

کہاں تلک کریں خواہش کہاں تلک چاہیں
جہانِ آرزو ہے اس کو نارسا کہیے

نویدِ امن ہے اس دہر میں تِرے باعث
دھڑکتے دل کی دھڑکتی ہوٸی صدا کہیے

تمام دولتِ دنیا لٹائی ہے تجھ پر
مرے خلوص کو پھر کیسے بے وفا کہیے

مرے سلوک کا دنیا کبھی ثمر تو دے
مجھے وفاٶں کے بدلے میں باوفا کہیے

ثمرین ندیم ثمر