غزل

Poetry - سُخن ریزے , / Sunday, October 19th, 2025

rki.news

مرے حق میں تیری دعا نہیں مجھے علم ہے
وہ درختِ ربط ہرا نہیں مجھے علم ہے

مرے بخت میں نہیں روشنی تری چاہ کی
وہ وفا چراغ جلا نہیں مجھے علم ہے

تری خامشی سے کہاں ہے کوئی گلہ مجھے
مِرا خط ہی تجھ کو ملا نہیں مجھے علم ہے

کوئی زرد شاخ گری تھی سبز درخت سے
یہ دلیلِ ترکِ وفا نہیں مجھے علم ہے

چلے اُس کا نام بگاڑنے چلو چُپ رہو
کہ وہ شخص اتنا برا نہیں مجھے علم ہے

مِری جاں تو کتنی حسین ہے تجھے کیا پتا
تِرے ہاتھ پر یہ حنا نہیں مجھے علم ہے

تجھے کیا ہیں مجھ سے شکایتیں مجھے کیا خبر
مجھے تجھ سے کوئی گلہ نہیں مجھے علم ہے

نہیں مانتا دلِ تشنہ کام تو کیا کروں
تِری زلف کالی گھٹا نہیں مجھے علم ہے

میں جلوں گا ہجر کی آگ میں یوں ہی عمر بھر
مِری اور کوئی سزا نہیں مجھے علم ہے

افتخار راغبؔ
کتاب: لفظوں میں احساس