ملتان میں گنے کے نان تھرمل جوس کی پروسیسنگ پر عملی تربیتی سیشن

Green Pakistan - گرین پاکستان , Snippets , / Thursday, November 6th, 2025

rki.news

ایم این ایس زرعی یونیورسٹی ملتان
پریس ریلیز 06اکتوبر2025
ملتان۔ایم این ایس زرعی یونیورسٹی میں محکمہ ہوم سائنسز شوگرکین ریسرچ اینڈ ڈویلپمنٹ بورڈ (SRDB) کے فنڈ سے چلنے والے منصوبے (نمبر 23-17) “Standardization of Sugarcane Juice as a Value-Added Product” کے تحت نان تھرمل گنے کے جوس کی پروسیسنگ پر مبنی ایک ہینڈز آن ٹریننگ اور ڈیمونسٹریشن سیشن منعقد کیا گیا۔اس تربیتی پروگرام کا مقصد شرکاء کو گنے کے جوس کو محفوظ کرنے کی جدید نان تھرمل پراسیسنگ ٹیکنالوجیز جیسے پلسڈ الیکٹرک فیلڈ (PEF) اور اوزونیشن (O₃) کے طریقوں سے روشناس کرانا تھا، جو غذائیت کو برقرار رکھتے ہوئے مصنوعات کی شیلف لائف میں اضافہ کرتے ہیں۔ سیشن میں روایتی تھرمل پیسچرائزیشن اور جدید تحفظ کے طریقوں کا موازنہ کیا گیا، جبکہ پائیداری اور فوڈ سیفٹی کی اہمیت کو بھی اجاگر کیا گیا۔ ڈاکٹر عنبرین ناز، چیئرپرسن محکمہ ہوم سائنسز، نے پروجیکٹ کا تعارف پیش کیا، انہوں نے پاکستان کے ایگرو پروسیسنگ سیکٹر میں صفائی ستھرائی پر مبنی ویلیو ایڈیڈ گنے کی مصنوعات کی تیاری کی اہمیت پر روشنی ڈالی۔ڈاکٹر شبیر احمد، پروجیکٹ کے شریک پرنسپل انویسٹی گیٹر نے تحقیقی سرگرمیوں اور جوس کے معیار میں بہتری کے لیے کیے گئے اقدامات پر تفصیلی پریزنٹیشن دی۔مہمانِ خصوصی چوہدری فضل، ترقی پسند کاشتکار، نے گنے کے جوس میں ویلیو ایڈیشن کی اہمیت پر گفتگو کرتے ہوئے اس کے ذریعہ کسانوں کے آمدنی کے متنوع ذرائع پیدا کرنے اور کٹائی کے بعد نقصانات میں کمی کی ضرورت پر زور دیا۔پروفیسر ڈاکٹر مبشر مہدی، ڈائریکٹر ORIC، نے یونیورسٹی کے انکیوبیشن سینٹر کے کردار پر روشنی ڈالی، جو تحقیقی منصوبوں کو کاروباری منصوبوں میں ڈھالنے اور زرعی مصنوعات کی کمرشلائزیشن کے فروغ میں مدد فراہم کر رہا ہے۔بعد ازاں شرکاء نے نان تھرمل جوس پروسیسنگ میں استعمال ہونے والے آلات کی لائیو ڈیمونسٹریشن دیکھی، جس میں PEF یونٹ اور اوزون جنریٹر شامل تھے۔ ریسرچ ایسوسی ایٹ علی حمزہ نے جوس نکالنے، اوزونیٹڈ پانی سے جراثیم کشی اور محفوظ اسٹوریج تکنیک پر عملی تربیت دی۔یہ تقریب سائنسی علم، صنعتی ضرورت اور عملی اطلاق کے حسین امتزاج کی عکاس تھی، جو پاکستان کے پائیدار زرعی فوڈ پروسیسنگ اور ویلیو ایڈیشن کے وژن سے ہم آہنگ ہے۔اس موقع پر یونیورسٹی فیکلٹی اور طلبہ و طالبات کی کثیر تعداد موجود تھی۔
ریاض احمد ہراج
ترجمان زرعی یونیورسٹی ملتان