آمد ماہ صیام

Poetry - سُخن ریزے , Snippets , / Friday, February 28th, 2025

ماہ صیام آیا ہے تعظیم کو اٹھو
اذن ثواب لایا ہے تعظیم کو اٹھو
صحن چمن میں پھولوں کی مہکار خوب ہے
دوش فضا پہ چڑیوں کی چہکار خوب ہے
رحمت کا ابر چھایا ہے تعظیم کو اٹھو
اذن ثواب لایا ہے تعظیم کو اٹھو
وہ نیلے آسمان پہ تاروں کا قافلہ
مہتاب ، کہکشاں کا بھی پھیلا ہے سلسلہ
امبر بھی مسکرایا ہے تعظیم کو اٹھو
اذن ثواب لایا ہے تعظیم کو اٹھو
ساحل پہ موج دریا بھی ہے دف بجا رہی
تعظیم ماہ صوم میں نغمے لٹا رہی
ہر شئے پہ کیف چھایا ہے تعظیم کو اٹھو
اذن ثواب لایا ہے تعظیم کو اٹھو
صحرا کے ہونٹ پہ بھی تبسم کا نور ہے
اور برف پوش کوہ پہ چھایا سرور ہے
ہر سو خوشی کا سایا ہے تعظیم کو اٹھو
اذن ثواب لایا ہے تعظیم کو اٹھو
غافل ہے ، بدنصیب ہے ، ناکام نور ہے
‌ منزل کےپاس رہ کے بھی منزل سے دور ہے
کیوں خواب تم کو بھایا ہے تعظیم کو اٹھو
اذن ثواب لایا ہے تعظیم کو اٹھو

نور اقبال (جگتدل)
مغربی بنگال