جرمنی کی عبیرہ ضیا نے چیئرپرسن سے ملاقات کی

Events - تقریبات , Snippets , / Sunday, August 10th, 2025

rki.news

عبیرہ ضیا ممبر یوتھ کونسل کی ڈاکٹر نجیبہ عارف چیر پرسن اکیڈمی ادبیات سے ملاقات
عبیرہ ضیا نے شریف اکیڈمی کی پانچ سالہ رپورٹ پیش کی
پرائم منسٹر یوتھ کونسل اوورسیز چی پٹر جرمنی کی فعال ممبر اور شریف اکیڈمی جرمنی کی اعزازی رکن، محترمہ عبیرہ ضیاء نے حال ہی میں اسلام آباد میں اکادمی ادبیات پاکستان کا دورہ کیا۔ اس موقع پر ان کی ملاقات معروف ادیبہ، دانشور اور اکادمی ادبیات پاکستان کی چیئرپرسن پروفیسر ڈاکٹر نجیبہ عارف سے ہوئی، جو ادب، تعلیم اور قومی شناخت کے لیے نمایاں خدمات انجام دے رہی ہیں ْ

اس ملاقات کا مقصد جرمنی میں اردو ادب کی ترویج کے لیے کام کرنے والی شریف اکیڈمی جرمنی کی سرگرمیوں سے اکادمی ادبیات کو آگاہ کرنا اور دو طرفہ ادبی روابط کو فروغ دینا تھا۔ عبیرہ ضیاء نے ڈاکٹر نجیبہ عارف کو شریف اکیڈمی کے ماہانہ ادبی اجلاسوں، مکالماتی نشستوں، اور نوجوانوں میں اردو زبان و ثقافت کی ترویج سے متعلق تفصیلی بریفنگ دی۔

ملاقات کے دوران، عبیرہ ضیاء نے شفیق مراد (چیف ایگزیکٹو شریف اکیڈمی) کا خصوصی پیغام اور اکیڈمی کی پانچ سالہ کارکردگی رپورٹ بھی پیش کی، جسے ڈاکٹر نجیبہ عارف نے نہایت تحسین کی نگاہ سے دیکھا۔ انہوں نے شفیق مراد کی اردو زبان کے لیے خلوص نیت پر مبنی کوششوں کو سراہتے ہوئے کہا کہ دنیا کے کسی بھی حصے میں جب زبان، تہذیب اور ادب کے لیے اردو سے محبت کرنے والے سرگرم ہوں تو یہ ایک روشن مثال بن جاتی ہے۔

اس موقع پر عبیرہ ضیاء نے ڈاکٹر صاحبہ کو جرمنی میں ہونے والے آئندہ ادبی پروگراموں میں شرکت کی دعوت دی، اور بالخصوص شاعر مشرق علامہ محمد اقبال کے شہر ہائیڈل برگ (جرمنی) کے دورے کی خواہش کا اظہار کیا۔ ڈاکٹر نجیبہ عارف نے نہایت خوشی کے ساتھ اس دعوت کو قبول کیا اور کہا کہ یورپ میں اردو زبان کی بقا اور فروغ کے لیے ایسے روابط از حد ضروری ہیں۔

یہ ملاقات نہ صرف ایک بین الاقوامی ادبی تعاون کی علامت ہے بلکہ اس بات کا ثبوت بھی ہے کہ پاکستانی دیاسپورا، خصوصاً نوجوان خواتین، عالمی سطح پر ملک کی ثقافتی شناخت کے فروغ میں اہم کردار ادا کر رہی ہیں۔

عبیرہ ضیاء کی یہ کوششیں اس بات کا واضح اظہار ہیں کہ وہ نہ صرف یورپ میں پاکستان کا مثبت چہرہ اجاگر کر رہی ہیں بلکہ ادب، تعلیم، نوجوان قیادت اور ثقافت کے میدان میں ایک پُل کا کردار بھی ادا کر رہی ہیں۔