غزل

Poetry - سُخن ریزے , / Tuesday, January 24th, 2023

افتخار راغبؔ
دوحہ قطر

مہرباں ہے تری محبت کیا
دل پہ طاری رہے گی وحشت کیا

تیری آنکھوں کی گفتگو اے شوخ
میں نے سمجھا کہ ہے بلاغت کیا

رنج دے کر بھی خوش نہیں ہیں وہ
مسکرانے کی تھی ضرورت کیا

کیوں اندھیرے دکھا ریے ہیں آنکھ
پست ہے روشنی کی ہمت کیا

ضد کے بادل اُدھر اُمنڈنے لگے
آنے والی ہے دل کی شامت کیا

اس طرح فاصلہ بڑھانے سے
ختم ہو جائے گی محبت کیا

دل سے ہے انسلاکِ دل راغبؔ
فاصلوں کی ہے کوئی وقعت کیا