غزل

Poetry - سُخن ریزے , Snippets , / Tuesday, September 23rd, 2025

rki.news

کس کی آمد سے گلشن میں صدقے جائیں گل
چہرے پر مسکان لٹائیں ہنستے جائیں گل

یا رب ان پر رحمت تیری سایہ گستر ہو
صحرا کی اس تپتی دھوپ سے بچتے جائیں گل

یہ کیسا انصاف ہوا ہے آج عدالت میں
خار ہیں قاتل کلیوں کے اور پکڑے جائیں گل

کاش چمن کے ہر گوشے میں ایسی بھی رت آئے
بھونرے گائیں گیت خوشی کے سنتے جائیں گل

اس کو چمن کی قسمت سمجھیں یا موسم کا کھیل
پیڑ گلوں کے بڑھتے جائیں گھٹتے جائیں گل

جب پھولوں کی وادی میں وہ نکلیں برائے سیر
منصور ان کے قدموں پر سب جھکتے جائیں گل

منصور اعظمی دوحہ قطر