rki.news

اب محبت نبھانے کے دن آ گئے
اُن سے آنکھیں ملانے کے دن آ گئے

رنج و غم بُھول جانے کے دن آ گئے
زیر لب مسکرانے کے دن آ گئے

تیرگیء شب ہجر رخصت ہوئی
شمع عشرت جلانے کے دن آ گئے

اے ہوائے مخالف یہ سن غور سے
تجھ سے پنجہ لڑانے کے دن آ گئے

ظلم کی سب حدیں پار تو کر چکا
تیری ہستی مٹا نے کے دن آ گئے

میرے فن کو بقا کی سند مل گئی
فخر سے سر اٹھانے کے دن آ گئے

بام دل پر چلے آئیے آپ بھی
چاندنی میں نہانے کے دن آ گئے

بستر خواب غفلت سے اٹھئے ذرا
رہبروں کو جگانے کے دن آ گئے

پونچھ لو اپنی آنکھوں سے اشک الم
اب تو ہنسنے ہنسانے کے دن آ گئے

خدمت قوم و ملت کی خاطر ہمیں
اب سیاست میں آنے کے دن آ گئے

دیکھ کر ظُلم ظالم کے میں کیوں کہوں
غم کسی کا بھلانے کے دن آ گئے

اٹھ سدا دے اناالحق کی منصور تو
دار کو پھر سجانے کے دن آ گئے

منصور اعظمی دوحہ قطر