غزل

Poetry - سُخن ریزے , / Tuesday, August 20th, 2024

روح کیا جسم کو ڈھکنے کی قبا بھول گۓ
اب تو ہم اپنے سروں کی بھی ردا بھول گۓ

دورِ ماضی میں جو منسوب رہی تھیں ہم سے
آج کیوں اپنی وہ ہم شرم و حیا بھول گۓ

کیوں نہ پھر اپنے اشاروں پہ نچاۓ دنیا
ہم انا دار ہی جب اپنی انا بھول گۓ

ایسے الجھے ہیں زمانے کے مساٸل میں ہم
کون ہے غیر تو ہے کون سگا بھول گۓ

خود کے کردار کی جب کر نہ سکے رکھوالی
آنکھ بچوں سے ملانے کی ادا بھول گۓ

آیٸے پاس کہ کچھ دیر گلے شکوے ہوں
آپ سے لوگ ہی کیوں رسمِ وفا بھول گۓ

ہم نے جس دنیا کو سمجھا ہے صبیحہ سب کچھ
یہ بھی ہو جا ۓ گی اک روز فنا بھول گۓ

ڈاکٹر صبیحہ ناز حسین