پھر ضد پہ اَڑ رہا ہے شجر اعتبار کا
طوفاں سے لڑ رہا ہے شجر اعتبار کا

توسیع ہو رہی ہے رہِ اعتبار کی
رستے میں پڑ رہا ہے شجر اعتبار کا

پھل دار ڈالیوں کی بدولت زمین پر
ماتھا رگڑ رہا ہے شجر اعتبار کا

بے اعتباریوں کا ہے سیلاب ہر طرف
پانی میں سڑ رہا ہے شجر اعتبار کا

اکڑے ہوئے درختوں کا انجام دیکھیے
عبرت پکڑ رہا ہے شجر اعتبار کا

شاخوں نے اتنا ڈال دیا بارِ اعتبار
جڑ سے اُکھڑ رہا ہے شجر اعتبار کا

راغبؔ یہ لگ رہا ہے کہ ٹوٹے گی کوئی شاخ
پھر سے اکڑ رہا ہے شجر اعتبار کا

افتخار راغبؔ
دوحہ، قطر
کتاب: غزل درخت