December 27, 2024
ہو چراغِ علم روشن ٹھیک سے
ذہن ہوں جگمگ نئی تکنیک سے
علم سے روشن تو ہو اٹھّا دماغ
دل کے گوشے رہ گئے تاریک سے
راے کوئی مت کرو قائم ابھی
دیکھ لو پہلے ذرا نذدیک سے
مرتبہ کس کا ہے کیسا کیا پتہ
باز آنا چاہیے تضحیک سے
ہاتھ پھیلانا مقدّر بن نہ جائے
پیٹ بھرنا چھوڑ دیجے بھیک سے
جڑ گیا شیشہ بھروسے کا مگر
رہ گئے تھے بال کچھ باریک سے
جس کا مقصد ہو قیامِ عدل و امن
دل ہو وابستہ اُسی تحریک سے
بے سبب راغبؔ تڑپ اُٹھتا ہے دل
دل کو سمجھانا پڑے گا ٹھیک سے
افتخار راغبؔ
ریاض، سعودی عرب
کتاب: خیال چہرہ
At 'Your World in Words,' we share stories from all over the world to make friends, spread good news, and help everyone understand each other better.
© 2024
Rahbar International
